GELATO CON CAFFE

31 қаңтар күні Еркеғали Рахмадиев атындағы Мемлекеттік академиялық филармониясы сіздерді итальян музыкасының ғажайып атмосферасына шақырады. Қ. Жұмакенов атындағы үрлемелі оркестр «Gelato Con Caffe» концерттік бағдарламасын ұсынады. Концертте әйгілі неаполитан әндері, итальян эстрадасының танымал хиттері, сондай-ақ Эннио Морриконе мен Нино Рота сияқты итальян композиторларының кинотуындылары орындалады. Итальян музыкасының жауһарлары филармонияның концерт залында, Кенесары көшесі 32 мекенжайы бойынша тыңдарманға жол тартады. Басталуы 19:00-де.

Итальян әндері бірнеше онжылдықтар бойы көрерменнің сүйіспеншілігі мен танымалдығын жоғалтпай келеді. Баршаға таныс әуендер филармонияның солистері мен үрлемелі оркестрінің орындауында жаңа қырынан көрініс табады. Кеш барысында «Ricchi e Poveri» тобының репертуарындағы атақты «Mamma Maria», Дарио Фаринаның «Felicita», Тото Кутуньоның «Amore No» және «L’Italiano», Боб Мерриллдың танымал «Mambo Italiano», Энрико Карузоға арналған Лучо Далланың «Карузо» әндері шырқалады.

Итальян әндерін Алтынбек Арыстанбек, Ринат Нұрмұхан, Әкімхан Маженов, Ақбота Құснадин, Құралай Мейрамбек, Алтыншаш Мұқатаева, Парасат Отан, Бақдәулет Жақыпов, Әнел Смаилова, Мұратбек Хайролда, Айдын Жұмабай, Нұрсәт Алмас, Дәурен Төлеубаев, Хамит Отарбаев, ҚР еңбек сіңірген қайраткерлері Азамат Жылтыркөзов пен Бибігүл Жанұзақ, сондай-ақ Камералық хор әртістері орындайды.

Үрлемелі оркестрдің орындауында көрермендер итальян композиторлары Нино Рота мен Эннио Морриконенің әлемдік кино музыкасының жауһарларын тыңдайды. Бұл шеберлердің шығармалары әуенінің ерекше саздылығымен, әсем гармониясымен және терең эмоциялық реңктерімен танымал. Концертте Эннио Морриконенің «Миссия» фильміндегі «Габриэльдің гобойы» және «Cinema Paradiso» туындыларын Сая Жақсылыққызы орындайды. Сонымен қатар Нино Ротаның «Крестный отец» фильмінің саундтрегі шырқалады. Бұл музыка кинодан асып, концерт залдарында ерекше әуезділікпен шырқалатын туындыға айналды.

Үрлемелі оркестрдің көркемдік жетекшісі Никита Почиталин.

Бас дирижёр Дархан Рахымғалиев.

Итальян кешінің әсерлі әуендері сіздерге тамаша көңіл күй мен жағымды эмоциялар сыйлайды!