МАЙДА ҚОҢЫР

2025 жылдың 22 ақпан күні Еркеғали Рахмадиев атындағы мемлекеттік академиялық филармониясының солисі, Мәдениет саласының үздігі, «Ерен еңбегі үшін» медалінің иегері Берік Омаровтың «Майда қоңыр» атты жеке концерті өтеді. Филармония концерт залы, басталуы 17.00 де.

Берік Құдайбергенұлы Омаров 1975 жылы Абай облысы, Аягөз ауданы, «Овцевод» ауылында дүниеге келген. Ол өнер жолын Алматыдағы Өнер академиясында әйгілі әнші, композитор Бекболат Тілеуханның шәкірті ретінде бастады. Кейіннен Әміре Қашаубаев атындағы облыстық филармонияда әншілік қызмет атқарып, мәдениет саласында елеулі еңбегімен танылды.

2020 жылдан бері Берік Омаров Астанадағы Еркеғали Рахмадиев атындағы филармонияның «Халық әні» бөлімінде қызмет етеді. Ол Қазақстанның дәстүрлі ән өнерінің үздік үлгілерін кеңінен насихаттаушы. Біржан салдың, Ақан серінің, Жарылғапберді мен Сегіз серінің әндері Берік Омаровтың орындауында Қазақ радиосының «Алтын қорына» енгізілген.

Берік Омаров Қазақстанның дәстүрлі ән байқауларының бірнеше дүркін лауреаты. Оның өнері «Шабыт» фестивалі мен Ж. Елебеков атындағы байқауларда жоғары бағаланды. Сонымен қатар, ол көптеген республикалық және аймақтық байқаулардың жүлдегері.

Кеш барысында тыңдармандарға қазақтың халық әндері мен күйлерінің жауһарлары, сондай-ақ, Берік Омаровтың орындауындағы дәстүрлі әндердің әсем палитрасы ұсынылады. Бұл концертте қазақтың халық әндері мен күйлерін, сондай-ақ, ұлттық би өнерінің үздік үлгілерін тамашалайсыздар.

Бағдарлама қазақ халқының рухани мұрасын қамтитын әуендер мен күйлерден тұрады. Құрманғазының «Төремұрат» және «Терісқақпай» күйлері, Мұхиттың «Үлкен айдай» , Ақан Серінің «Ләйлім шырақ», , Жарылғапбердінің «Топайкөк» , Тұрдықылыш Ізтаевтың «Шаттық», Сәкен Сейфуллиннің «Біздің жақта» әні.

Концертке «Сарыарқа» халық музыка ансамблі, «Шалқыма» халық би ансамблі, Қазақстанның еңбек сіңірген қайраткерлері Айгүл Қосанова, Гүлмира Сарина, Мәдениет саласының үздігі Ершат Қайырхан, күйші Дарын Құдайбергенов қатысады.