Азамат Жылтыргузовтың Астанадағы жеке концерті

2025 жылғы 9 ақпан күні Еркеғали Рахмадиев атындағы мемлекеттік академиялық филармониясының камералық залында Қазақстанның еңбек сіңірген қайраткері Азамат Жылтыркөзовтың жеке концертін ұсынады. Концерт ұлы композитор Петр Ильич Чайковскийдің 185 жылдығына арналған.

2025 жылдың басты музыкалық оқиғасы ұлы орыс композиторы Петр Ильич Чайковскийдің туғанына 185 жыл. Оның шығармалары адамзаттың музыкалық жылнамасындағы жарқын беттердің бірі болып табылады. «Жанымның бар күшімен менің музыкама адамдардың қызығушылығы артып, сүйіспеншілігі мен қолдауын табуын қалаймын», деп жазған Петр Ильич Чайковский. Бұл сөздерде оның өнерінің негізгі мақсаты музыкаға және адамдарға қызмет ету, олардың ең басты, маңызды және толғандыратын мәселелері туралы «шыншыл, шынайы және қарапайым» түрде сөйлесу нақты айқындалған. Чайковскийдің музыкасы адамның жүрек түкпіріндегі нәзік сезімдерін оятып, махаббат пен жанашырлықты, жақсылық пен бақытқа деген сенімді дәріптейді.

Чайковский шығармашылығында романс жанры ерекше орын алады. Онда автордың көркемдік даралығы айқын көрініс тапқан. Композитор романстарды шығармашылық жолының барлық кезеңдерінде жазған. Оның қаламынан 100-ден астам фортепиано сүйемелдеуімен орындалатын романстар мен әндер туған. XIX ғасырдың романстарының ішінде Чайковскийдің туындылары терең әрі жан-жақты лирикалық ойдың шыңы болып саналады.

Петр Ильич Чайковскийдің романстарын Қазақстанның еңбек сіңірген қайраткері, «Дарын» мемлекеттік жастар сыйлығының лауреаты, белгілі опера әншісі Азамат Жылтыркөзов орындайды. Кеш барысында «Нам звезды кроткие сияли», «Моя баловница», «Слеза дрожит», «Чаровница», «На сон грядущий», «Первое свидание», «День ли царит» сынды алтын қордағы ең үздік романстар орындалады.

Белгілі баритон Азамат Жылтыркөзовтың кәсіби жетістіктері мол. 2006 жылы ҚазҰӨУ студенті кезінде ТМД елдері қатысушыларының IV Халықаралық Дельфий ойындарының алтын медалін жеңіп алды. 2007 жылы Варшавада өткен С. Монюшко атындағы вокалистердің VI Халықаралық байқауында Польша музыка академиясының арнайы сыйлығын иеленді. 2023 жылдың сәуір айында классикалық өнер саласындағы халықаралық BraVo сыйлығымен марапатталды. Ресей, Беларусь, Қытай, Жапония, Польша, Оңтүстік Корея, Сауд Арабиясы, БАӘ, Иордания, Швейцария, Австрия, АҚШ, Моңғолия елдерінде гастрольдік сапармен өнер көрсетті.

Концертке сонымен қатар филармонияның классикалық вокал бөлімі солисі, республикалық және халықаралық байқаулардың лауреаты Фирузә Рахметова қатысады. Оның орындауында А. Толстойдың сөзіне жазылған «Горними тихо летела душа небесами», Л. Мейдің сөзіне жазылған «Канарейка», В. Сологубтың сөзіне жазылған «Скажи, о чём в тени ветвей», А. Плещеевтің сөзіне жазылған «Весна» романстары орындалады.

Вокалдық өнердің үздік туындылары рояльдің сүйемелдеуімен ұсынылады. Фортепиано партиясын Еркеғали Рахмадиев атындағы Мемлекеттік академиялық филармонияның классикалық вокал бөлімінің көркемдік жетекшісі, «Мәдениет саласының үздігі» Роза Шотқалиева орындайды.